Höf. 

Nærandi sjálfsnudd með olíum


Að gefa sér góðan tíma í sjálfsrækt og dekur er öllum nauðsynlegt en sérstaklega þeim sem vinna mikið eða eru sífellt að hugsa um aðra. Ein aðferð til þess er hin fallega indverska athöfn Abhyanga sem felst í því að nudda sjálfa/n sig frá toppi til táar með volgri olíu, áður en farið er í sturtu. Þetta er aðferð til hreinsunar og heilsubótar samkvæmt indversku lífsvísindunum Ayurveda og aðferð sem margir jógar nýta sér. Reglulegt sjálfsnudd á að geta aukið vellíðan og er sérstaklega gott fyrir þá sem finna fyrir streitu eða verkjum í líkamanum.

Þessi dásamleg athöfn tekur aðeins 5 til 20 mínútur en er alveg hreint ótrúlega slakandi og nærandi.

Kostir Abhyanga eru ótal margir. Með því að nudda inn í líkamann volgri olíu nærir þú allan líkamann, eykur blóðflæði, mýkir liðina, róar taugarnar, bætir og dýpkar svefn, eykur hreinsun líkamans og nærir hársvörðinn svo eitthvað sé nefnt. Samkvæmt Ayurveda er misjafnt hvaða olíur henta hvaða „dosha“ eða líkamsgerð en aðalmálið er að olían sé lífræn og frá góðu merki. Ef þú vilt taka prófið um hvaða „dosha“ þú ert samkvæmt Ayurveda, smelltu þá HÉR.

OLÍUR:

Eftir DOSHU eða líkamsgerð:

Vata : 4-5 sinnum í viku og nota sesame eða möndlu olíu.

Pitta: 3-4 sinnum í viku og nota kókos eða sólblómaolíu.

Kapha: 1-2 sinnum í viku og nota safflúrolíu – e. Safflower

Öllum þremur gerðum hentar: Jojoba olía

Mér finnst best að gera Abhyanga rétt fyrir svefninn til að losa um stress og þreytu og þá geta olíurnar nært hásvörðinn yfir nóttina, sem ég svo hreinsa úr með kaldri morgunsturtu. Ég er af líkamsgerðinni Pitta svo að ég nota oftast lífræna kókosolíu frá Himneskt eða einhverja góða olíu frá NOW og nudda líkamann frá toppi til táar. Á meðan ég ber á mig olíuna er mikilvægt að ég taki þessa stund í að anda djúpt, vera í núinu og fylgjast með því sem ég er að gera.

AÐFERÐ:

  1. Settu olíu í skál eða bolla og ofan í mjög heitt vatnsbað og leyfðu vatninu að hita olíuna. Athugaðu hitann með því að setja dropa á innri úlnlið, olían ætti að vera notalega volg en ekki heit.
  2. Komdu þér fyrir á þæginlegum stað í volgu herbergi. Ég nota baðherbergið, hita það vel upp og set undir mig handklæði.
  3. Samkvæmt fræðunum er best að byrja á hársverðinum en ég geri það ekki alltaf þar sem stundum vil ég sleppa því að fá olíur í hársvörðinn. En best er að byrja á því að hella olíu á hvirfilinn og vinna sig rólega niður höfuðið með hringlaga strokum. Eyddu nokkrum mínútum í að nudda allt höfuðleðrið, þar er að finna marga mikilvæga orkupunkta.
  4. Nuddaðu næst andlitið með hringlaga strokum, ennið, kinnar, kjálka, en allt í strokum upp á við. Vertu viss um að þú nuddir eyrun, sérstaklega eyrnasnepplana þar sem eru taugaendar og orkupunktar.
  5. Notaðu þá langar strokur til að nudda hendur og fætur og hringlaga strokur til að nudda liði eins og olboga og hné. Nuddaðu alltaf í átt að hjartanu.
  6. Nuddaðu kviðinn og brjóstið í stórum hringjum, réttsælis. Nuddaðu upp kviðinn hægra meginn svo yfir og niður vinstra meginn.
  7. Kláraðu loks nuddið með því að nudda fæturna í nokkrar mínútur. Þar eru margir mikilvægir punktar svo að gott er að nudda iljarnar rækilega.
  8. Sittu með olíuna 5-15 mínútur ef mögulegt er til þess að olían geti smogið vel inn í húðina. Þessa stund er gott að nýta í hugleiðslu, öndunaræfingar eða til að drekka slakandi kamillu tebolla.
  9. Farðu svo í heitt bað eða sturtu og helst ekki nota sápu nema þá á mjög ákveðin svæði og ekki nudda húðina of mikið. Þegar þú kemur úr baðinu eða sturtunni, þurrkaðu húðina létt og varlega með handklæði.

 

Njóttu vel

Dagný

p.s. hér er myndband af ferlinu:

  • 25. apríl, 2016
  • 0
Dagný Berglind Gísladóttir
Um höfund

Dagný er ritstýra tímaritsins Í boði náttúrunnar og vefstjóri Gló. Hún er með BA gráðu í ritlist og listfræði og MA í Hagnýtri ritstjórn og útgáfu frá Háskóla Íslands. Hún er mikið náttúrubarn, lærður jógakennari, í merki vatnsberans með ástríðu fyrir listum og heilsu.

Þú gætir einnig haft áhuga á þessu

DIY – Höfuðverkjasalvi
17. október, 2016
DIY- Kvöldhreinsun
06. september, 2016
Þín eigin nuddolíublanda
27. ágúst, 2016
Jólagjafahugmyndir fyrir sælkerann
15. desember, 2015
DIY – Fótadekur
05. desember, 2015
Það skiptir máli hvað þú setur á þig
08. september, 2015
Dítox á hverjum degi
26. júlí, 2015